وصفات لتفتيح الوجه

وصفات لتفتيح الوجه

للبشره العاديه والجافه والدهنيه

لو عندك كده فرح بليل ولا مشوار حلو ولا حصلت معجزه وجوزك قرر يعزمك على العشا بره

وعايزه وشك جميل ورايق حتى من غير مكياج

هقولك على ماسك جميل بيشد الوجه وكمان يتح البشره وبينقيها

ماسك طبيعى من ادوات المطبخ الجميل بتاعنا وغير مكلف

1- شويه رده

2- معلقه عسل

3- معلقه ماء ورد

4- نص ليمونه للبشره الدهنيه

5 -معلقه زبادى لو البشره عاديه او جافه

قلبيهم ف بعض وحطيهم على وشك 20 دقيقه

اشطفى وشك بعدها بماء فاتر

 

علاج تشقق القدمين

علاج تشقق القدمين

طبعا احنا فى شتا وساعات بنلاقى رجلينا ناشفه جدا

والتشققات الى بتزيد فى الشتا مره ورا مره بتحتاج شغل مكثف

طيب وصفه حله ومجربه لمده اسبوع وشوفى بيبى صغير وهتلاقى  رجلك انعم من رجله

ايه بقى الوصفه

1- اناء مايه سخنه جدا اقصى حاجه تقدرى تستحمليها

2- شويه شامبو صغيرين

3- شويه ملح

وانقعى رجلك ف المايه لمده نص ساعه يوميا لمده اسبوع

وانتى حاطاها ف المايه هاتى حجر اسود او اى حاجه من ادوات القدم خشنه وادعكى بيها رجلك وهاتى كريم بشره عادى جدا وحطيه على رجلك بعد متنشفيها والبسى شراب

طبعا ده كل يوم لمده اسبوع قبل النوم

بعد الاسبوع ادعيلى يا جميل

 

علاج الشعر التالف

علاج الشعر التالف

السلام عليكم يا انسات ويا سيدات

الحقيقه المره ديه انا جايه اتكلم عن الشعر غالبا كلنا بنعانى من تلف الشعر

وانا كنت عايزه اقول ان التلف كمان بيادى فى بعض الاحيان الى زياده خشونه الشعر يعنى البنوته الى شعرها خشن قوى هوه فى الواقع موش بالسوء ده لكن التلف بيخليه سئ جددا

وفى سيدات شعرهم ناعم وبعد فتره تلاقيه ملبد وموش عارفه حتى تسرحه وبهتان ومقصف

طب العلاج ايه

تغزيه الشعر شئ مهم جدا

1- بيضه

2- 2 معلقه مايونيز

3- 2معلقه زيت زيتون

اغسلى شعرك وحطى الخلطه ديه وبعد ساعه اشطفيه واعمليها مره كل اسبوع وليكن كل جمعه مثلا

ومن تانى مره هتحسى بالفرق

بالنسبه بقى لتساقط الشعر جربى تاخدوا فيتامين بى -وفيتامين بى12

مفيد جدا يا بنات وملوش طبعا اضرار ومفيد كمان للارهاق

 

اخلاق تستحق التامل

السلام عليكم جميعا
حصل لى موقف النهارده وكان نفسى قوى احكيه لناس كتير وكان نفسى اقول لكل الناس اتفرجوا على الاخلاق المصريه البسيطه للناس الفقيره الى بتديك امل ان بكره احلى احلى بجد واجمل من كل عيون الى عايزين يشوهوا الصوره الى موش شايفنا من جوانا
قابلت والد فقير جدا بيبيع بخور تقريبا فى اعدادى وجه يبيع لى بخور
قللته موش عايزه يا عسل وجيت اديله فلوس
قالى لا يا ابله ديه تبقى شحته خدى بخور وادفعى الى تدفعيه
صراحه مكدبش عليكوا مبحبش البخور الى بيتباع عندنا هنا ف مصر بيتعب صدرى
ورحته موش اد كده ومحبش اشترى حاجه موش هستعملها
قلته يا بنى خد الفلوس كانك بعت البخور وكانى يا سيدى عزمتك على حاجه ساقعه
قالى لا يا ابله معلش سلام عليكوا اخويا علمنى ان كده شحته ومشى

انا الصراحه حبيته جدا اد ايه محتاج الفلوس ومخدهاش ومشى فعلا وسابنى
قلبت عليه الشارع تانى عشان اشترى منه موش لاقيته وزعلت قوى من نفسى انى مشيت راجل زى ده على الرغم من صغر سنه
هوه راجل بجد
عزه نفس وكرامه واخلاق
انا فعلا متضايقه من نفسى انى مخدتش منه بس انا عذرى انى كتير بشترى حاجات برميها وبيتنصب عليه
يعنى تشترى شامبو من الجائلين يطلع صابون سايل ده مثال انا ياما اتقرصت فمعدتش بشترى منهم
لكن النهارده الولد بصغر سنه واخلاقه علمنى ان صوابعى موش زى بعضيها
وعلمنى الكرامه
وحسسنى انى غلطت لما حاولت اديله فلوس بدون مقابل عشان معودهوش الشحاته
طبعا التدوينه ديه هتقولولى ايه علاقتها بكلام ستات مهو كله كلام ستات
والى تحب تحكى لنا عن موقف يخصها يا ريت